Phile | MEK | STEP |

Filemon

Philemon

Paulo Malele Epapua Filemon Eegai Eulaisa Auga

1 Lau Paulo. Lau Iesu Kristo faugai latipula au malele lapapua, ke aki'a Kristiano auga aka Timoti aunimai akamaisai, oi ekefa'amaiagai fou pinauga aga'omo akapa aumu Filemon eemuai aulaisa. 2 Ke i'ina malelega oi mo eemu aefai kai i'a afakua'a Kristiano papiega Afia, ke lai fou i'a a'a pako'a faugai ifani auga emia epipaini auga Akipus, ke Kristiano papiau'i oi emu e'ai kela'afou au'i isafa ee'iai aulaisa. 3 Lai amegamega ega koa Ama'a Deo, ke a'a Lopia Iesu Kristo fou e'i gafegafe akaiki'a ke gagao fou fekepenimi foagu felo aoma.

Filemon Alo Ko'agai Iesu Epako'ania Ke Papiau Ma'oai Isafa Ani'i Eani

4 Lau aufa kina lamegamega aisama, oi laopolanio ke aufa kina Deo tenkiu lapenia aefuafua. 5 Gome oi alomu ko'agai Lopia Iesu Kristo anina loani ke lopako'ania, ke alomu ko'agai Deo ega papiau isafa ani'i loani auga fouga lalogo. 6 Lau lamegamega ega koa oi emu pako'a Iesu Kristo eegai looge auga pako'aga papiau isa'i isafa maa'iai foifania laoma. Ega koa ega'ina pinaugaga oi agepapeaiso alolao Iesu Kristo faugai i'a alo'aisai laomai felo'i ma'oai kekae au'i oko'i alologo felo. 7 Gome oi alomu ko'agai Deo papiau fou ani'i loani auga laoga maina epaameisau ke alou epagama. Akiuagai, lau ega laifa oma gome oi ega koa lokapaisa Deo ega papiau ma'oai alo'i lopakakipo.

Paulo Onesimus Faugai Filemon Egoinia

8 Ega puo pau oi alomu ko'agai papiau ma'oai ani'i loani kainai, lau oi lagoinio. Lau Paulo, pau lameisani ke Iesu Kristo faugai tipula au lamia puo, kapa'ina anina laani auga alou aipagai oi fapainio fokapa. Ega mo ganinagai lau oi alapaini kapulanio mokapa alaoma kai, lau oi lagoinio fokapa laoma. 10 Ke pau auga Onesimus ^{▼▼10 Grik malagai aka ega'ina auga, 'pipalagai felo auga' fouga eifania.} oi emu kala'afi, lau gau emia auga faugai lagoinio pugu. Isa auga lau tipula afugai laaguega kai, lau faagauai Iesu epako'ania kainai, isa lau gau ko'a ipauma koa i'opoga emia. 11 Ufainagai isa oi eemuai kapa felo aga'o aekapaisa. Kai pau kapa'ina ekapa auga oi eemuai felo, ke lau isafa eeuai felo. Ega puo lau isa faugai oi lagoinio.

12 Ke lau isa laulaisa emue oi eemu efai pugu. Lau alou ko'agai isa anina laani alogaina puo, isa lau guau fou akefai koa i'opoga. 13 Lau anina laani lau iifa faunina Iesu Kristo fouga puogai inae tipulai laague alogai, isa lau eeuai mo feagu, ega koa oi afumu feafia fepalagainiau laoma. 14 Kai lau oi alologo koa kai, kapa aga'o fakapa auga anina alaani. Ega koa oi kapa'ina fokapa looma auga falapaafio folokapa kai ifomu logomuai mo fokapa laoma. 15 Gome lau laopolaga Onesimus oi epua'afunio epo afa emaefa auga, isa agemue eemu agefai pugu aisama, oi isa foafi umania mo puo ega emia oma. 16 Ke isa agefai eemuai aisama, isa oi emu kala'afi afaemia pugu kai, kala'afi ageka'egaini'i, aamu akimu Kristiano auga anina loani alogaina auga aga'o koa i'opoga agefai. Ke lau alou ko'agai isa anina laani alogaina kai, oi auga isa anina aloani pagainia. Ega'ina auga, isa oi emu kala'afi mo puogai anina afoloani kai, Lopia Iesu lopako'ania kainai, aamu akimu Kristiano auga aga'o koa anina aloani alogaina.

17 Ega puo oi loopolaga lau oi fou pinauga aga'omo akapa looma koa aisama, lau ala foifa koko omaisau looma koa i'opoga, isa ega foifa koko oma. 18 Ke isa oi eemuai kapa apala aga'o ekapaisa o kapa aga'o eemuai eafiia kai, afa aeogeisa koa aisama, ega'ina afa'i lau akauai fooge lau afa'i alaoge. 19 Lau Paulo i'ina iifaga ifou imauai lapapua. Lau afa alaoge laoma auga afa alaoge paisa. Kai lau kapa'ina oi faagamuai lakapaisa auga afa fooge auga eegai iifa aga'o afalaifania. 20 Akiuagai, Lopia faugai kapa'ina lagoinio auga fokapa, ega koa faagamuai kapa felo aga'o faafia laoma. Iesu Kristo faagagai i'a fou aa'a aki'a amia kainai, ega koa alokapa aisama alou agekakipo. 21 Ke oi lau ainau aloafia auga alouai lapako'a kapulania. Ke lau kapa'ina laifani'i au'i mo afolokapa'i kai, laagai kapa ma'o akaiki'a'i isafa alokapa'i auga lalogo. Ega puo i'ina malelega lapapua eemuai laulaisa.

22 Ke kapa aga'o fokapa pugu laoma auga, lau e'u feufeu afuga aga'o fokapa, gome Deo oi emu megamega a'o agelogo, lau oi eemu alafai pugu auga afia'amaga laafia'ama.

23 Epafras lau aunimai Iesu Kristo faugai tipulai aague auga ega pamego iifa'i oi eemuai eulaisa. 24 Ke lau fou apinauga au'i Mako, Aristakus, Demas, ke Luka isafa e'i pamego iifa'i eemuai keulaisa.

25 Lau lamegamega ega koa Lopia Iesu Kristo ega gafegafe akaiki'a oi fepenio alomuai feka laoma.